సందర్భము :
భగవాన్ శ్రీ కృష్ణుని భోధన విని భౌతిక జగత్తు మీద మోహము తొలగిన అర్జునుడు , భగవానుని దివ్య విశ్వరూపమును దర్శించాలని కోరుతాడని క్రిందటివారము చదివాము .
ఈ వారము విశ్వరూప దర్శనమిచ్చిన భగవంతుడు ఎలా ఉన్నాడో, దూరదృష్టితో శ్రీ కృష్ణార్జున సంవాదము చూస్తున్న సంజయుని వివరణ చదువుదాము .
8 నుండీ 19 శ్లోకముల సారాంశము :
అర్జునుని విన్నపమునకు భగవానుడు ఇలా పలికెను :
ఓ అర్జునా! నా యొక్క విశ్వరూపము దర్శించుటకు భౌతిక దృష్టి సరిపోదు. నీకు నేను దివ్య దృష్టి ప్రసాదిస్తున్నాను, ఈ దృష్టితో నా మహాద్భుతమయిన వైభవమును దర్శించుము అని పలికెను .
దూరదృష్టితో శ్రీ కృష్ణార్జున సంవాదము చూస్తున్న సంజయుడు ఈ విధముగా పలికెను:
ఓ మహారాజా! (ద్రుతరాష్ట్రుడు), భగవంతుడు అలా పలికిన తరువాత తన దివ్యమయిన మరియూ వైభవోపేతమయిన రూపమును అర్జునునికి చూపెను .
ఆ దివ్య విశ్వరూపములో అర్జునుడు , అంతములేనన్ని ముఖములూ, కన్నులూ, దివ్యాభరణములు , ఆయుధములూ చూసేను . ఆ శరీరము అనేకమూలములు కలిగి ఉండి , దివ్యపరిమళములు గుబాళించుచున్నది . అనంతమయిన ఈశ్వరునిగా తన ముఖంతో శ్రీకృష్ణుడు తాను వ్యక్తపరుచుకుంటున్నాడు.
వెయ్యిమంది సూర్యులు ఒక్కసారి ప్రకాశించినా, ఆ రూపము యొక్క తేజస్సుకు సాటి రావు . సమస్త బ్రహ్మానండములన్ని ఆ శరీరములో ఉన్నట్టు అర్జునుడు దర్శిస్తున్నాడు .
అలా పరమాశ్చర్యమునకు లోనయి, రోమములు నిక్కబొడుచుకున్న అర్జునుడు చేతులు జోడించి భగవంతుని ఈ విధముగా స్తుతించెను :
ఓ కృష్ణా ! నీ దేహమునందు నేను సకల దేవతలనూ , ఎన్నో ప్రాణకోటి సమూహములను , కమలమునందు కూర్చుని ఉన్న బ్రహ్మదేవునీ, శివుడిని మరియూ దివ్య సర్పములనూ చూచుచున్నాను.
లెక్కించలేనటువంటి చేతులతో, ఉదరములతో , ముఖములతో , కళ్ళతో అనంతమయిన రూపములను అన్నిదిశలలో చూస్తున్నాను. విశ్వమే నీ యొక్క స్వరూపమయిన ఓ విశ్వేశ్వరా ! నీయందు నాకు ఎటువంటి మొదలూ , మధ్యమము మరియూ అంతమూ కనిపించుటలేదు .
కిరీటము గధా-చెక్రాయుధములతో నీ యొక్క స్వరూపమును దర్శిస్తున్నాను . సూర్యునిలా అన్ని దిశలలో అగ్ని వదులుతున్న నీతేజస్సు చూడటానికి కష్టతరముగా ఉన్నది .
నీవే నాశనము లేనట్టి పరమేశ్వరుడవని , వేదములచే ప్రతిపాదించబడిన పరమ సత్యమని , సమస్త సృష్టికి ఆధారమని , సనాతన ధర్మమునకు రక్షకుడవని , నిత్యం శాశ్వతమయిన అందరికంటే గొప్ప భగవంతుడవని తెలుసుకున్నాను.
ఆది - మధ్య - అంతములేని , అపరిమితమయిన శక్తులు కలిగిన , అనంత మయిన భుజములు కలిగిన, సూర్యచంద్రుల వంటి నేత్రములు కలిగిన , అగ్ని లాంటి నోరు కలిగిన , సమస్త సృష్టిని వెచ్చగా నీ తేజస్సుతో ఉత్తేజపరుస్తున్నటువంటి నిన్ను నేను దర్శిస్తున్నానని అర్జునుడు పలికెను .
ఈ వార సారాంశము ఇంతటితో సమాప్తము . వచ్చేవారం అర్జునుడు భగవాన్ శ్రీ కృష్ణుని వివరూపములో చేసిన మరిన్ని విషయములను మనము చదువుదాము .
8 నుండీ 11 శ్లోకముల గూర్చి మరింత సమాచారమూ మరిన్ని ఉదాహరణాల కొరకు Reference Book భగవద్గీత - భగవంతుని మధురవాణి స్వామి ముకుందానంద గారి వ్యాఖ్యానము తప్పక చదవండి.
మీ యొక్క సందేహముల జవాబు కొరకు, మరియూ భగవద్గీతను మరింతగా అర్థం చేసుకొనుటకు ప్రతి బుధవారం నుండి శుక్రవారం 7:30AM నుండి to 8:30AM వరకూ జరిగే భగవద్గీత సంభాషణలో భాగం వహించండి. అలా వీలు కానిచో వచ్చే వారం మళ్ళీ ఈ శీర్షికను చదవండి.
సారాంశం: JKYog ఇండియా ఆన్‌లైన్ క్లాస్- భగవద్గీత [తెలుగు]- 4 నుండి 6 జూన్ 2025 వరకు.
